宅男女神話想買將軍澳樓

【明報專訊】地產網站GoHome.com噚日係馬會搞咗個卓越地產代理頒獎禮，雖然請咗唔少發展商售樓部阿頭撐場，但最吸引小琴眼球嘅嘉賓，就係呢排榮獲「宅男女神」稱號、令一眾宅男神魂顛倒嘅新紥姐仔岑麗香（香香）。小琴向來關心香江樓市走勢，見到香香，就梗係要問吓佢對政府規定冇「三粒星」嘅人要買港樓，要比多15％買家印花稅（BSD）既睇法啦。


買樓要畀BSD 搵錢要更努力

香香好嬌俏咁用佢唔鹹唔淡既廣東話講，家重未係香港永久居民（即係冇三粒星），買樓要畀多15％BSD，所以要加多15％嘅努力工作搵錢。香香仲話自己一直有上GoHome.com搜羅樓盤資料喎，目標係先喺將軍澳買個細單位自用，貪該區近電視城，之後有能力再換大屋。