葉國謙嘥紙印千項修訂

【明報專訊】民建聯葉國謙喺立法會財務委員會復會後，「返嚟就郁」，要求收緊議員提出動議嘅次數，結果惹嚟泛民向佢全面宣戰。單係就如何修例，泛民已經團結一致咁提出1244個修訂，希望「以拉布抗剪布」咁話。


其實，經過「5司14局」一役，大家都知道，喺拉布下提出嘅修訂都係無無聊聊嗰類，唔值得印出嚟細閱，即使係泛民，亦都係以電子方式提交修訂。不過，噚日葉國謙為咗「畀大家知泛民有幾無聊」，竟然走去印晒千幾項、合共高達5吋嘅修訂案出嚟，大大疊展示喺Emily同一眾行家前面。有份提出修訂嘅人民力量黃毓民，見狀即刻批評葉國謙唔環保，浪費地球資源。


厚達5吋 黃毓民批唔環保

有人話，阿謙幾乎可以肯定唔會全部細閱呢啲修訂，如果係咁，又何苦要做「樹木殺手」呢？Emily就係咁望住疊紙，都覺得好對唔住大自然！