立會儀器死火人手投票

【明報專訊】添馬艦立法會新大樓剛啱入伙時，曾經被批工程質素差，事隔一年，雖然大樓嘅「執漏工程」大致上已經完成，但會議廳內嘅電子投票系統同音響設備就成日故障，好似噚日下晝舉行嘅內會，亦都因而鬧出笑話。


話說噚日工黨張超雄動議，喺內會下設立研究全民退休保障嘅小組委員會，方便處理呢個跨部門議題。不過，動議出師不利，會議廳嘅咪竟然全線失靈，秘書處職員要將無線咪傳來傳去畀議員發言。音響壞咗都算，連提醒議員投票嘅鐘聲，以及電子投票系統都死火，最終議員要用最原始嘅方法——舉手投票。秘書處職員要即時點人頭，但唔係好認得新議員，不時要內會主席梁君彥提醒，場面都幾尷尬。


雖然大部分議員因音響問題「被消音」，但工黨張國柱支咪不但無問題，佢喺投票期間同黨友傾偈內容，意外咁入晒咪，搞到佢好似做緊旁述咁，記者更不時聽到佢嘅「分析」，「睇嚟都係幾票之爭」、「仲爭葉建源未投票」。阿柱事後話，佢當時已示意職員幫佢熄咪，但熄唔到，仲笑言好彩自己唔係講粗口嘅人。


退保小組動議遭否決

呢項動議雖然獲得泛民及勞聯支持，但由於公民黨湯家驊有會議在身而趕不及投票、毛孟靜趕住返中大教書、教育界葉建源早走咗、工黨李卓人出埠開會，最終贊成票只得24張，不敵民建聯及其他建制派嘅26張反對票。唔夠票成立全民退保小組，泛民只好怪自己唔齊人。