中大醫科生著Tee 提醒林鄭「勿通匪類」

【明報專訊】政務司長林鄭月娥噚日到中文大學演講，提到領袖嘅基本要求，係要「責無旁貸」（the bucks stop here），而有讀醫科嘅一年級學生噚日就著住印有「勿通匪類」標語T恤同林太對話，話要提醒林太，佢嘅同事「多災多難」，「勿通匪類」咁話。


主持嘅中大高級講師蔡子強就提醒林太，「中大呢度唔係麗港城，我哋中大保安組亦唔係香港警方，所以著件咁嘅T恤嚟問問題，係唔會畀人『的』走嘅」，惹來全場大笑。


烏龍政政系生叫林鄭「局長」

不過，林太又點會搵唔到機會反擊？有個政治與行政學系學生向林太發問嗰陣，唔知點解，話林太係由1200人「選」出嚟，仲叫佢做「局長」。林鄭皮笑肉不笑咁問咗一句：「政政系學生吓嘛？」跟住澄清自己係委任嘅。坐喺隔籬嘅蔡子強都有少少尷尬，唯有問：「司長你係咪話緊我呀？」