入咗行會葉劉照遊行

【明報專訊】新民黨主席葉劉淑儀雖然獲委任為行政會議成員，但佢對政府亦未有全力護航，日前就話行會同事林奮強應該考慮仲係咪留任。葉太噚日又帶領副主席田北辰、區議員謝子祺，以及一班外傭僱主去政府總部外示威，希望政府永久撤銷外傭稅，仲促請政府立法設「外傭試用期」。


再促撤外傭稅

2008年葉太剛入立法會時，佢已經動議政府永久撤銷外傭稅，搞到政府好頭痕，最終決定讓步至設5年豁免期，呢個豁免期下年8月就會屆滿。葉太亦趁機會去示威，反對政府重推外傭稅。


葉太話外傭政策有好多地方不合時宜，佢話有唔少外傭僱主都反映，同外傭解約時索性賠錢同機票等費用，以免1個月通知期間外傭會疏忽照顧家人。佢促請政府平衡外傭同僱主權益，增設外傭試用期，若僱主喺外傭到任不足3個月內解除合約，只需要畀7天代通知金。