張震遠自稱新移民後人

【明報專訊】協助新來港同少數族裔融入香港嘅組織新家園協會，噚日舉行助學金頒獎典禮，仲請咗行政會議成員張震遠、立法會議員蔣麗芸等做主禮嘉賓。面對一班新移民學生，張震遠「認親認戚」，自爆其實父母都係新移民，所以好明白新移民處境。佢仲話反對內地自由行嘅香港市民唔係主流意見。


張震遠話，佢父母1949年先嚟香港，當年係新移民，完全明白新移民要適應新環境嘅難處。佢話幫助新移民融入香港，仲有助香港發展。


近月有港人對自由行比較反感，張震遠就對住成班新移民學生話，香港有人不滿自由行，甚至發表偏激言論，佢聲稱有關言論唔係香港人嘅主流聲音同睇法，強調香港係一個開放嘅社會，開放先係港人嘅核心價值。


而同樣擔任主禮嘉賓嘅教育局常任秘書長謝凌潔貞，就同台下學生分享小故事。佢話認識有原本唔識中文嘅學生，透過去圖書館睇中國歷史書，了解歷史之餘亦學到中文，鼓勵新移民努力，相信都可以克服困難。


講番噚日個助學金頒獎禮，其實係新家園協會會長許榮茂撥出200萬嘅專項基金，為1000個學生提供每人2000蚊嘅資助，幫輕吓佢哋嘅書簿費。