港股100強 四叔恒地竟排99

【明報專訊】近期港股表現唔錯，恒指重上22000點，可能見個市幾旺，騰訊網同財華社就搞咗個「港股100強」選舉，將過千隻香港上公司評頭品足，分出高下。


不過細看個100強，身為華人首富誠哥隻和黃（0013），雖然市值3400億元，都係只排22名，「1號仔」長實（0001）就得33名，反而市值得500幾億嘅內房股恒大地產（3333）高企第8位，四叔嘅恒基地產（0012）仲慘，幾乎包尾，排99位，排名仲後過富力（2777）、同綠城地產（3900）等內房股。


睇番主辦機構介紹，話評選係比較市值、股本回報、股息回報同埋淨利潤等項目得出嘅，咁排頭一、二位係邊個？咪就係工商銀行（1398）同埋建設銀行（0939），唔知讀者心目中又會點排呢。


恒大排名高過長和

主辦機構仲搞咗好多榜，好似「最有潛力獎」、「飛騰獎」等十足萬千星輝賀台慶，當中有個最搞鬼嘅叫「奇蹟獎」，聯想（0992）、香港電訊（6823）都有份，反而股價屢創「奇蹟」嘅騰訊（0700），唔知係咪要避嫌，榜上無名。