長毛偷雞登陸日本

【明報專訊】外界有啲人成日以為社民連「長毛」梁國雄難登大雅之堂，其實佢不知幾受國際歡迎，噚日佢應日本一間大學邀請，就釣魚島問題發表演說。1996年保釣後曾衝入日本駐港總領事館示威嘅長毛，原來曾經兩度申請日本簽證被拒，因此今次係佢第一次去日本。


呃海關話無被拒入境

長毛笑言，過境時被日本海關問佢，有冇曾經被拒入境，佢呃海關話冇，所以今次成功踏足日本，都有少少「偷雞」成分。佢話，喺演說上，佢清楚要求日本就二次大戰道歉同埋賠償，「呢條係底線，你唔道歉嘅話，講乜都冇用」。


長毛喺立法會向官員掟嘢就掟得多，喺中日關係水深火熱期間，講咁激嘅說話，驚唔驚㗎？「日本人和善啲嘅，大阪又冇右翼分子，唔會擔心畀人掟雞蛋」。


首次到訪日本嘅長毛，只係短短逗留3日，今日返嚟立法會開會，佢好滿足咁話，抵達日本時，約咗一個多年前喺倫敦認識嘅朋友飯敘，肯定不枉此行。其實，長毛嘅大阪之旅險告泡湯，人哋本來係約佢上星期演講，佢因要開特別財會傾長者生活津貼被迫留港，難得主辦方面願意延期遷就佢。