黃碧雲「失蹤」唔覆機

【明報專訊】黃碧雲（Helena，圖）盛傳係下屆民主黨主席大熱，但呢個立法會新丁似乎唔多鍾意面對傳媒，經常「失蹤」。Emily前日諗住搵佢，想問對同志平權動議嘅意見，打咗4次電話都飛去call台。Emily唯有喺call台留言，又打畀Helena嘅助理，助理話已經通知Helena有記者搵佢。不過，Emily等咗成晚，始終等唔到Helena覆電話。


Emily同行家傾開，原來唔少人都有類似經歷，有行家試過連續3日打畀Helena都搵唔到，唔通做咗議員就忙成咁？

Helena呢排都算惹火，之前喺facebook暗指新民主同盟係「民建聯Ｂ隊」，新民主同盟范國威要求佢喺飯盒會就言論道歉。Helena噚日回應話，上星期已經道歉，問范國威「唔識字㗎咩」，又話范國威係男人嚟，唔知係咪暗示叫佢唔好咁小器呢？