立會開會爆玻璃

【明報專訊】立法會爆玻璃？你冇聽錯，莊嚴嘅立法會會議廳，噚晚開會時，正門對上嘅玻璃突然爆裂！意外發生時傳出一陣巨響，嚇親會議廳內嘅議員，搞到立法會主席曾鈺成要即時安撫佢哋，仲叫佢哋唔好走近正門入口。


爆玻璃後，立法會職員即刻封門，議員進出會議廳都要行側門。其實，新立法會大樓入伙後，唔少地方都有甩漏，好似自動門失靈同升降機掣飛脫等，但爆玻璃呢啲可以釀成傷人嘅事故真係未試過。


阿人：危機四伏

公民黨湯家驊笑言，唔知係咪班議員噚日傾同志平權傾得激得滯，搞到玻璃都爆埋，佢批評新大樓用唔夠一年就出事。工黨李卓人話，家陣大樓危機四伏，「唔明點解啲嘢咁化學」，認為行政管理委員會有必要跟進仲有冇其他「豆腐渣」工程，保障大家安全。