CY邀奧巴馬訪港

【明報專訊】奧巴馬當選美國總統，世界各地嘅「指定動作」一定係發出賀電祝賀佢成功連任。喺香港時間前晚奧巴馬證實當選之後，當各地陸續喺之後嘅幾個鐘頭發出賀電，而我哋嘅梁特首噚日先至發賀電畀奧巴馬，比其他地區或國家領導人遲咗一日，不過，始終係有心唔怕遲。


奧巴馬當選總統，香港時間周三晚已經通世界都知道，睇睇喺香港同一個時區嘅領袖，國家主席胡錦濤同國務院總理溫家寶喺同日下晝已經發賀電；台灣總統馬英九、新加坡總理李顯龍就喺前晚發出賀電。


不過，遲到總好過無到，CY喺信函入面，除咗祝賀奧巴馬連任，仲請佢喺任內到訪香港，希望佢「親身了解為何香港對在亞洲發展的美國商界具有如此大的吸引力」。


煲呔08年曾邀請無果

佢仲話，希望奧巴馬喺未來4年深化兩地聯繫，並且促進美國、香港和中國之間嘅了解。睇番2008年美國大選後，曾蔭權發畀奧巴馬嘅賀電，原來當時煲呔都有「借啲意」喺信中請奧巴馬來港，但最終當然無成事。