杜葉錫恩自爆與毓民恩怨

【明報專訊】前立法局議員杜葉錫恩雖然年屆99歲，早已退休，但原來佢仲好留意時事。日前佢睇到人民力量黃毓民喺建制派支持下，擊敗工黨何秀蘭躋身立法會政府帳目委員會後，即刻寫信畀Emily，叫社會提防毓民咁話，仲大爆兩人17年前嘅陳年恩怨。


杜葉錫恩喺封信起首，形容喺1995年認識毓民係一件「不幸」嘅事。佢憶述，毓民當年幫時任支聯會主席司徒華喺觀塘助選，而佢自己就係華叔嘅對手，喺一場電視論壇，佢得悉主辦單位會有翻譯，咁先至選擇用英語發言，但毓民向觀塘街坊話佢一句廣東話都唔識講。杜葉錫恩最終輸喺華叔手上。


杜葉錫恩喺信入面話，從毓民「背叛」何秀蘭一事，已反映出佢嘅真面目既非為民主、亦唔係為人民福祉喎，仲話相信佢有「對港人有害」嘅政治盤算，希望港人加以防範咁話。


毓民：唔知佢講乜

毓民就回應話，唔知點解杜葉錫恩要搵番10幾年前嘅嘢出嚟講，「都唔知佢講乜」。