阿涂突襲 CY冇中招

【明報專訊】立法會開鑼都有個幾月，噚日就宴請一眾高官食飯，家立法會人數多咗，午宴亦由過去筵開6席變成8席。食飯時，涂謹申喺席上問特首梁振英，中共總書記胡錦濤前日發表十八大報告，佢有無收到報告？CY咁小心，當然唔會被阿涂「裝到」，佢仲即時指正阿涂，話呢份係共產黨嘅報告，唔係政府報告。


梁振英同枱議員有經民聯林健鋒，民主黨涂謹申、胡志偉，獨立嘅廖長江同李國麟等。阿涂其後話，席間都係風花雪月為主，例如推介美國邊度食生蠔、去沙特阿拉伯旅行有咩要注意咁。


不過，新民主同盟范國威就只係入去請願，唔留低食飯，CY一入場亦好配合范國威，面向記者接收佢「守護龍尾」標語，范國威送埋寫有「看你橫行到幾時」嘅螃蟹水墨畫，CY亦欣然接受。


CY獲「看你橫行到幾時」蟹畫

至於新民黨葉劉淑儀同田北辰就無現身，葉太話，其實佢哋係約咗商務及經濟發展局長蘇錦樑食飯。Emily好奇怪，點解蘇錦樑咁大膽，唔跟老細出席大圍飯局，而去同兩個議員撐枱腳？葉太就話，呢餐飯同局長約咗好耐，改咗好多次期，蘇錦樑亦經常唔喺香港，所以唯有缺席立法會午宴喇。


成班議員食完飯後一齊影大合照，民主黨何俊仁被安排企喺最後一排，佢企高咗幾級都畀人遮住，影佢唔到，唯有踩住一疊全新嘅A4紙當做高台。