林鄭「關心」到歐洲

【明報專訊】政務司長林鄭月娥事事關心，由扶貧到中學縮班都有佢份，幾乎日日曝光忙到爆，佢不但要處理內務，仲要搞埋「外交」。今個月12日至17日，佢要去英國倫敦同西班牙，推廣香港商機同交流城市管理經驗。


港府噚日公布，林鄭月娥聽晚去倫敦，12日至14日喺倫敦，除咗出席貿發局周年晚宴，去英國文化協會舉辦嘅論壇，仲同英國國會議員及高級官員、多個商貿和專業組織會面。


未知會否倫敦見家人

林鄭早前去中大同師生對話時承認，上任4個月以來時有孤獨感覺，因為無家人喺身邊，無一個肩膀依靠。林太家人長居英國，但佢今次行程咁緊張，唔知可否同家人一聚？


林太今次帶埋同事去西班牙馬德里和巴塞隆拿考察，佢會代表香港同巴城市長簽署諒解備忘錄，推動兩地喺城市規劃和海濱改善方面嘅交流。


許曉暉隨團往訪

呢次行程，民政局副局長許曉暉都會去，原本傳佢會出任文化局，但政府改組不成，局長夢碎。佢噚日出席立法會民政事務委員會，被議員問到成立文化局嘅進展，佢話「有關計劃已被暫時擱置」，又話設立文化局或喺民政事務局下推動文化工作，各有優點。