搞錯假碧雲被提醒 譚香文鬧埋民主黨蠢

【明報專訊】疑似喺立法會投錯票「放生林奮強」嘅民主黨黃碧雲近日相當惹火，有網民就喺facebook整咗個名為「碧雲邪神_黃碧雲」嘅專頁，仲扮以黃碧雲第一身批評前立法會議員譚香文。雖然明眼人一睇專頁個名就知係惡搞之作，偏偏自稱係「民主女神」嘅譚香文，就當正對方真係黃碧雲，大罵黃「so stupid」。有民主黨「乳鴿」善意提醒譚香文，但譚仲反罵番成個民主黨都係蠢材。


「碧雲邪神」原是A貨

話說有網民喺「碧雲邪神_黃碧雲」專頁度扮黃碧雲批評譚香文，指對方唔係民主派。譚香文於是喺facebook轉載咗，批評呢個「黃碧雲」「so stupid」。民主黨「乳鴿」黎敬瑋見狀，好客氣咁提醒佢呢個專頁係假嘅，叫佢唔好咁認真，點知獲譚女神回敬﹕「all DP members are so stupid, like Lai」（所有民主黨人都如黎一樣愚蠢）。


有心水清嘅人即時醒起，譚女神當年捲入賄選案時，都係多得資深大律師李柱銘幫手先打得甩，唔知佢又覺得呢個民主黨創黨主席係咪都係「so stupid」呢？Emily覺得，譚香文不滿黃碧雲係一件事，但咁樣一竹篙打一船人似乎唔抵爭喎。