民建聯午夜凶鈴做民調？

【明報專訊】「你好，我哋係民建聯打嚟做民意調查嘅……」如果你喺夜晚11點45分收到呢個「午夜凶鈴」，你會點反應？讀者黃小姐打電話向Emily投訴，話喺11月5日接近半夜收到自稱民建聯嘅民調音頻電話，真係估都估唔到。


黃小姐嬲起上嚟即時收線，佢第二日夜晚9點左右致電民建聯總部算帳，可惜接聽者以要開會為由收咗佢線，並無交代「凶鈴」因由，「點解佢夜晚打畀我就得，我打畀佢就唔得？」

葉國謙：無理由

Emily問過民建聯立法會議員葉國謙，阿謙聞言相當驚訝，話事件相當離奇，因為音頻電話早已設定喺特定時間運作，無理由會半夜擾民，而佢哋啲職員斷估都唔會喺嗰段時間打電話。佢話半夜做民調嘈到人就「肯定唔啱」，佢會返去了解吓有無件咁嘅事，但佢亦話，過去都接過投訴，指有人冒充民建聯打畀市民做民調喎，所以一定要搞清楚件事。