謝志峰趕走一人眾喝采

【明報專訊】噚日港台《城市論壇》討論極具爭議的同性平權，Emily到嘅時候已經見到有阿叔手持寫住「同性有罪」嘅牌，大喊唔應該畀同性戀合法化。論壇未開始已火花四起，但激辯嘅唔係與會者，而係兩名反對同性戀合法化嘅維園阿叔同主持謝志峰。


事緣兩個阿叔未開始已經不停用侮辱字眼批評同性戀者，又大叫「叫雞合法化」，謝志峰聽到就同佢哋講，一陣節目開始後唔該唔好用啲咁嘅用詞，應該要理性討論；但嗰兩個阿叔無理到，其中一個仲朗讀《聖經》，投訴謝志峰偏幫同性戀者，謝志峰話無，仲話自己有老婆仔女，唔係同志。


到觀眾發問環節，兩個阿叔繼續發功，一個話「慢必」陳志全係垃圾議員，另一個就大叫大嚷，最後謝志峰忍唔住趕走其中一人，現場觀眾即刻拍掌叫好。