阿涂：唔排除議員對人唔對事

【明報專訊】政府推出嘅政策幾乎次次都好多人反對，立法會選舉「票王」民主黨涂謹申噚日接受訪問時話，家立法會同政府無乜互信，唔排除有議員對政府抱「對人唔對事」嘅態度，連市民都激進。佢認為成熟發展嘅社會，應該以中間、溫和嘅市民佔大多數，但家社會走向兩極，佢話無必要咁發展。


特首正會見各黨派諮詢對《施政報告》嘅意見，阿涂期望梁振英要有商有量吸納意見，而唔係「偏聽」建制派所言，因為咁做不利民生。


阿涂話，家立法會同政府關係緊張，政府推銷政策採取唔尊重立法會嘅態度，覺得有民意支持就硬推政策，佢警告咁做只會不利和諧同溝通，令政策「貪快得慢」。