6000蚊待領支票

【明報專訊】財爺曾俊華上年修改財政預算案向全港18歲以上永久居民派6000蚊，引嚟批評，唔少人覺得公帑應該用嚟幫有需要嘅人，無理由富豪都有得攞，但鬧還鬧，已經有好多人登記咗，財經事務及庫務局噚日話，「$6,000計劃」自上年8月28日啟動以來運作順暢，截至今年10月底已有超過600萬人登記，佢提醒大家截止登記日期去到12月31日，如果今年3月底前滿18歲又未登記嘅人，就要快啲登記喇。


逾600萬人已登記

雖然大部分人都用銀行戶口申領6000蚊，但亦有小部分人選擇喺郵局拎6000蚊支票，政府亦提醒大家，部分支票仍然待領，政府至今發出40.4萬張支票，約有4.4萬張仲未領取，其中約有330張有效期今個月中屆滿，另外1200張亦會喺今個月底屆滿，未領取嘅市民快啲去指定郵局攞票喇。