立會教議員撳掣

【明報專訊】立法會開鑼已經1個月，接二連三出現議員「投錯票」嘅情况，其中要數最經典嘅，梗係民主黨黃碧雲上周五贊成變棄權，令到要求休會辯論行政會議成員林奮強賣樓風波嘅動議，就差佢嗰一票而被否決。當晚，公民黨陳家洛亦出現撳贊成變棄權嘅情况，有見及此，秘書處周四就會為議員示範點用「電子表決系統」，莫非係專為黃碧雲而設？


黃碧雲話會去上堂

黃碧雲堅稱當日無撳錯掣，但就話如果周四時間許可，都會去「上堂」。佢透露，其實呢個學習班，係跟進佢上周撳掣同結果不符嘅問題。原來，佢喺周末同立法會了解究竟係咪表決系統出問題，雖然至今仍然係羅生門，但就揭示立法會係無議員撳邊一個掣嘅紀錄，只係會顯示投票結果，所以秘書處會加番部電腦做有關撳掣紀錄，議員第日就無得抵賴啦。


至於佢同陳家洛都出現同樣情况，秘書處檢查過兩人座位嘅表決機器，無發現問題，但為免再有羅生門，秘書處更換兩人嘅表決機。黃碧雲因為呢件事被人嘲笑係「一嚿雲」，佢期望經過跟進，毋須再「硬食」投錯票嘅罪名。


林奮強嘅休會辯論被否決，黃碧雲話，泛民將再提相關動議，申請喺28號嘅立法會大會討論，佢表明到時一定會拉多幾票，希望能夠通過喎。