何永謙去信高官闢謠

【明報專訊】曾經擔任梁振英競選辦副主任嘅何永謙，10年前已經離開政府，但公務員圈子到近期仍然流傳佢任職政府時，曾經「衰過」性騷擾女同事嘅謠言，令佢耿耿於懷。何永謙話真係忍無可忍，上禮拜發信畀公務員事務局長鄧國威同所有高官，講明先小人後君子，如果知道再有人喺背後抹黑佢，就會採取法律行動，告對方誹謗。


何永謙發火，要公務員事務局主持公道，但公務員事務局回覆Emily話，「本局不會就個別前任或現任公務員個案提供資料或作出評論」。


何永謙話，佢知道近期公務員圈子，仍有人流傳佢曾性騷擾女同事，佢呼冤話從來無做過咁嘅事，從無收過咁嘅投訴，亦無接受過調查。佢話，曾經向公務員事務局查核，局方都證實無處理過有關佢性騷擾嘅投訴。


指有人「唔想佢返政府」

點解政圈成日都有各種不利佢嘅傳聞，何永謙就歸咎政圈應係有人唔想佢重返政府，所以不斷重複放風抹黑佢，令到梁振英唔敢委任佢做一官半職咁話。


何永謙2002年離開政府時，官至衞生福利局副局長，佢喺特首選舉時做梁振英競選辦副主任，政府近期公布副局長同政助名單，佢榜上無名。佢話，無得做官事小，反正做官好辛苦，但名譽事大，仲話咁樣對佢或者曾被懷疑受侵犯嘅女同事都唔公平。


何永謙封信畀晒所有司局長同常任秘書長，佢喺信中講明，如果知道仲人唱衰佢，就一於告對方誹謗。不過，Emily就諗，公務員私底下講是非，其實都唔關局長或常秘嘅事，唔知佢封信會否有效用。