中電推智能電表

【明報專訊】中電預告明年會加電費，若果唔想捱貴電費，最好方法梗係節能，但用咗幾多電，用戶無從得知，要到兩個月派一次嘅成績表、即係電費單，先至知係咪有效。


選3000住宅試用

中電噚日宣布，推出為期18個月嘅智能電表及通訊系統試驗計劃，被選中嘅3000個住宅用戶以及1400家中小企，中電會為佢哋安裝新一代嘅智能電表，由於具備通訊功能，用戶可以透過網站、智能手機及平板電腦，遙距監察用電資料，從而改變用電習慣。


中電智能電網專責小組副總監彭立志話，新一代電表係智能電網嘅一部分，全球有超過150個地區已採用呢種技術，包括美國、歐盟成員及內地城市，已安裝咗數以百萬計嘅智能電表。中電嘅試驗計劃出年展開，可以測相關技術對客戶嘅實際效益。