「我無講過」激發無限創意

【明報專訊】梁振英不但擊敗唐英年登上特首寶座，分分鐘連唐英年嘅「政壇金句王」地位都搶埋，佢周一喺立法會答問大會上一句「記憶中，我無講過話我無僭建」喺網上熱爆，畀機會網民大展身手二次創作。芸芸眾多造句、改圖、改歌，Emliy首選「我記憶中，我無講過我無講大話」最啜核。


CY前日喺立法會爆金句，當晚已激發網民創意，最慘呢啲金句連累埋其他人，例如有網民話「民主黨﹕記憶中，我無講過我唔會投共」，擺明係諷刺佢哋曾經同中聯辦就政改「講數」。


有樂壇長毛之稱嘅周博賢，近日則就二次創作，將張學友經典名曲《每天愛你多一些》，改成《每天騙你多一些》，歌詞變成「而每過一天每一天哄騙者，瞞騙我多些再多些至滿瀉」、「不要離開，只願留低，誠共信早已枯毁」，冧歌頓變辣歌。


周一朝早開香檳 慶長津過關

不過，政府總部「門常開」近期都唔係只有悲歌，Emily得知，CY同司局長喺周一早上嘅例行「早禱會」開香檳慶祝。原來佢哋係為立法會上周五通過長者生活津貼慶賀，覺得係新一屆立法會成立後，政府做到一件對社會有意義嘅事。佢哋原本都以為上周五通過方案無望，因為當日勞工及福利局長張建宗，會前臨時提交長津「補充文件」，仲以為財委會主席張宇人會押後審理，估唔到竟然可以「突襲」通過，所以要象徵式飲番杯，慰勞成日去立法會聽拉布嘅張建宗。