卿姐唔選又選

【明報專訊】民主黨主席、副主席同埋中央委員會委員選舉峰迴路轉，噚日截止報名，主席之位竟有3人競逐，除咗現任副主席單仲偕同「乳鴿」南區區議員區諾軒，仲有一個Emily估唔到嘅人選，就係劉慧卿。卿姐之前話唔選黨主席，點解忽然反口，唔嫁又嫁，咁算唔算講大話呢？


卿姐同Emily講，呢個唔係講唔講大話嘅問題，而係形勢唔同咗。佢話當時真係計劃響應前主席何俊仁，一齊「裸退」，鼓勵新人入領導層，想民主黨有新氣象，點知胡志偉、黃碧雲等全部唔去馬。卿姐話，噚日朝早佢去睇報名名單，仲只係單仲偕一個，卿姐希望黨內有競爭，所以決定參選。至於怕唔怕畀人覺得民主黨無新氣象呢？卿姐好坦白咁話：「係呀，但都無辦法。」會否擔心有人鬧佢反口，卿姐就話民主選舉，由黨員決定。


單仲偕就組成「飛越」內閣，噚日正式宣布參選，佢競逐主席，同一內閣嘅蔡耀昌同「乳鴿」羅健熙就競逐兩個副主席職位。之前民主黨話希望多啲新人加入領導層，單仲偕就話，佢嘅內閣都有唔少80後黨員，已經有唔少新面孔。