末日救主長毛：救唔到長者

【明報專訊】如果今年12月21日真係世界末日，究竟邊個有能力拯救世人呢？根據高登同索尼香港於本月7至9日做嘅調查，有33%受訪者揀選社民連「長毛」梁國雄做救世主，力壓只得9%嘅梁振英，事關受訪者都覺得佢成日著住件哲古華拉T恤，覺得佢做事從一而終、有堅持，成個英雄咁喎。


「我唔想死住」成熱門告別話

呢個網上問卷調查，訪問咗1115人對世界末日嘅睇法，調查方法唔算科學，但攞嚟笑下無妨。結果顯示，雖然有多達七成港人唔信有世界末日，但都有計劃點樣過，好似有三成人想同父母過，兩成多人想同愛人或「小三」過，亦有一成多人想自己一個面對。有56%嘅受訪者想留喺香港度過「末日」，想喺強國嘅就只得1%咁大把。


有多達25%人希望喺「末日」同家人留喺屋企靜靜等待，其次有17%人想同伴侶去海邊睇日落，亦有一成人選擇「打機到最後一刻」；而「拜拜」、「我愛你」、「I'll (be) back」、「我唔想死住」同「game over」就成為最熱門嘅告別世界熱話。


「只想打救梁振英」

被選為「末日救世主」嘅長毛就話，拯救世界太深奧喇，事關佢想拯救70歲以上嘅長者免資產申報拎長者生活津貼都做唔到。佢又高舉兩手，話自己只想出盡力「打救、打救、打救梁振英」喎。