拖一年擺酒 攞多個意頭

【明報專訊】噚日係2012年12月12號，本世紀最後一次年月日都一樣嘅日子，696對愛侶特別揀喺呢日拉埋天窗，唔止各個政府註冊處都迫滿新人，就連私人證婚場地都迫爆。Emily噚日喺中環行咗一日，一對對新人同埋親友好似潮水式咁出入註冊場地，見證神聖一刻。


原來想要喺噚日去婚姻登記處註冊，一眾準新人就要一早喺8月29號登記，抽中11點45分註冊嘅楊生楊太，話登記嗰日校咗鬧鐘7點就起身，準備8點上網登記，結果一擊即中。


1/3/14寓意「一生一世」

唔想同其他新人爭嘅葉生葉太就揀咗私人證婚，但唔知係咪開心得滯，佢哋約咗證婚律師就唔記得約場地，到10月先發覺，好彩當時中環碼頭嘅證婚場所仲有位，仲咁啱喺12點鐘，湊夠4個「12」。佢哋會等到2014年3月1號先擺酒，話想攞「一生一世」（1/3/14）嘅好意頭！


入境處話，噚日結婚嘅數字係平日嘅4倍，不過唔夠舊年11年11月11號嘅1002對咁墟冚。Emily喺呢度祝福每一對夫婦可以白頭到老，永結同心！