提子失收紅酒料貴兩成

【明報專訊】到咗年底，樣樣嘢都話加價，連法國頂級紅酒都貴到飛起，啱啱喺法國返嚟嘅餐飲業大哥黃家和話，紅酒產區Burgundy今年提子失收，出年起碼要加價兩成。拿破崙當年打仗都要飲嘅Chambertin，貴到要成兩萬蚊一支，搞到黃生都唔捨得買。


拿破崙至愛兩萬蚊一支

今年酒價好穩定，事關舊年法國提子收成唔錯，但係今年法國靚酒產區Burgundy失收，剛啱去咗法國8日嘅餐飲聯業協會會長黃家和話，嗰邊今年一時旱、一時大雨，影響提子收成，所以出年酒會貴兩三成，有啲酒莊仲話會貴成半。


黃家和鍾情Chambertin，呢隻酒好勁㗎，連拿破崙去打仗都要帶喺身邊。黃生都有儲開呢隻酒，但係今年加價加成咁，佢話唯有忍手，遲啲等價格回落再買過。