湯家驊娶新抱 來賓畀面停戰

【明報專訊】律政司長袁國強噚日承認，建議終審法院將外傭居港權嘅官司，連同該《基本法》條文相關嘅事提請人大常委會釋法，引起法律界爭論及擔憂，但噚日大法官、大狀仍然好開心雲集洲際酒店，皆因本身係資深大律師嘅公民黨湯家驊娶新抱，法律界、政界人士都畀面到賀，暫時擱下爭論，舉杯同慶。


終審法院首席法官馬道立噚日唔肯回應居港權官司，但佢同4名終院常任法官都現身婚宴，而袁國強、前律政司長黃仁龍、前終院首席法官李國能等法律界重量級人馬齊齊現身。至於政界方面，前政務司長陳方安生、民主黨創黨主席李柱銘，以及經民聯主席梁君彥，都一齊賀湯家驊榮升老爺。


成晚同袁國強坐埋一齊嘅係民主黨涂謹申，唔肯透露有無當面質問對方建議釋法一事，只係話噚晚係開心場合，但就透露坐隔籬枱嘅社民連梁國雄，同袁國強講噚晚畀面湯家驊，所以唔大聲示威搞場，等袁國強鬆一口氣飲喜酒。不過，長毛都有搞搞氣氛，喺大家向一對新人祝酒時，就大聲要求新郎Justin要連生貴子，Justin亦回應話一定會努力，長毛未肯罷休，仲提醒對方要講得出做得到。


長毛追住叫新郎連生貴子

湯家驊榮升老爺當然好開心，喺婚宴上唔單止一對新人係主角，湯家驊仲同親家走上台合唱一曲《Fall in love with you》。