民主黨乳鴿「中生代」激戰

【明報專訊】唔係所有政黨都有黨內民主選舉，民主黨周日換屆，難得今年主席同副主席都各有3人參選，候選人噚日更首次回應質詢。民主黨兩個副主席單仲偕（右起）、劉慧卿，以及「乳鴿」南區區議員區諾軒都參選主席。有人以為，早前話唔選嘅卿姐突然唔選又選係旨在參與，原來佢今次嚟真，近日密密打電話箍票，對選情睇高一線嘅單仲偕構成暗湧。本身係「左翼21」成員嘅區諾軒，噚日喺論壇質疑單仲偕嘅右傾立場，單就回應話，路線嘅嘢，萬大事可以從長計議。


至於黨內中生代胡志偉、蔡耀昌同「乳鴿」南區區議員羅健熙，就參選兩個副主席職位，同樣火花四起。蔡耀昌質問羅健熙，點解黨內年輕化就一定要畀80後做副主席，羅就話呢場唔係世代之爭，只係想年輕人有晉升階梯。據聞爭持激烈，邊個當選，還看周日。