沈祖堯讚斌仔係明燈

【明報專訊】曾高呼「我要安樂死」嘅斌仔（鄧紹斌）日前因敗血病不幸去世，斌仔生前的其中一個好友、中文大學校長沈祖堯噚日喺網誌撰文悼念斌仔。沈校長喺網誌話對斌仔去世感到莫名沉重，但佢亦指出，斌仔已為港人留下對生命嘅反思、對尊嚴嘅定義，並讚揚佢係病人「生命的勇士、旅途中的明燈」。


安排斌仔分享 助圓老師夢

沈校長憶述，首次認識斌仔係2007年，睇電視得悉斌仔情况後，自已去瑪麗醫院探斌仔。其間，斌仔形容自己係「活屍骸」、「寄生蟲」，令沈深受感動，希望成為斌仔嘅朋友，完成佢嘅老師夢。翌年，沈校長安排斌仔到訪中大醫學院，同師生分享佢臥牀10多年嘅生活，在場者不禁流淚，上咗寶貴一課。


沈校長又透露，斌仔2010年出院後，係佢鼓勵斌仔參選「十大再生勇士」，當斌仔上台領獎嘅一刻，幾乎感動流淚，最後佢祝願斌仔「一路好走」。


另外，一向推動減少廚餘嘅沈校長嚟緊有新搞作，12月22日佢會喺中大新亞書院舉辦「廚餘派對」，趁12月21日係所謂「世界末日」之後1日，同大家分享剩食與生活。