末日遊戲展 啱一家大細

【明報專訊】一年一度嘅亞洲遊戲展將會喺所謂嘅「世界末日」之時、即係12月21日舉行，主辦商話，雖然唔打算搞末日派對，但今年為咗吸引已經生兒育女嘅「機迷」，新設親子區提供桌上遊戲，畀一家大細一齊玩，聲言遊戲唔只係電子遊戲咁簡單，仲會有教育意義同「不黃不暴力」喎。


亞洲遊戲展今年踏入第12屆，主辦商話當年第一批入場嘅朋友，家已經由港青變成港爸，為咗令呢班忠實支持者可以帶埋一家大細入場，加上佢哋係遊戲展唔係電子遊戲展，今年決定增設親子專區，畀一家大細玩有教育意義嘅桌上遊戲，鍾意嘅仲可以買埋番屋企玩。


亞洲遊戲展將12月21至24日喺會展舉行，除咗大玩親子概念，仲有日本流行歌手音樂會、超級電腦遊戲體驗區同新遊戲試玩區等。主辦商話，如果21號真係世界末日，打住遊戲機咁死都係一個唔錯嘅選擇喎。