吳綺莉駁斥成龍遊行論

【明報專訊】講過「中國人一定要管」嘅成龍，日前發表「遊行要管論」後，再次衝出娛樂版進佔港聞，可惜多數人對佢只有負面評價。Emily噚日咁啱喺立法會見到稀客吳綺莉，成龍就係同佢爆出婚外情，咁當然要問佢有乜高見。吳綺莉力撐港人遊行權利，仲話「港人遊行一定有佢嘅理由，如果唔係有時間去BBQ好過啦！」儼如摑咗成龍一巴。


石禮謙做導遊

吳綺莉（Elaine）噚日帶同疑似「小龍女」在內嘅幾個中學生，到新立法會大樓參觀，得到地產及建造界議員石禮謙接待。Elaine話，係朋友搭朋友咁識到石禮謙，佢話今次係第一次參觀立法會，希望向小朋友做好公民教育，平時除咗睇C1娛樂之外都睇埋港聞，但就話唔係好清楚「拉布嗰啲嘢」。


「港人遊行一定有理由」

Elaine咁有心搞公民教育，咁佢係咪同意成龍話齋，政府要管制香港乜嘢可以遊行、乜嘢唔可以？本來唔係好願意接受訪問嘅佢就好大方咁話，雖然冇睇過相關新聞，但香港係有言論自由，如果政府做得好，市民都唔會鬧啦。Elaine又大讚港人理智，相信佢哋出嚟遊行一定有原因，「唔會無端端出嚟嘅」，否則有時間去燒嘢食好過。


咁佢又點睇被指係「大話精」嘅梁振英呢？佢慨嘆全世界嘅經濟都唔好，政府冇可能完美，笑言生活喺香港都好過喺希臘喎。疑似小龍女面對鏡頭時亦相當敏感，仲拎相機出嚟反拍記者