湯家驊娶新抱 收釋法「厚禮」

【明報專訊】公民黨湯家驊（Ronny）前日高高興興娶新抱，卻獲律政司長袁國強送贈釋法呢份「厚禮」，真係多得佢唔少。新任老爺Ronny話，最初冇諗過會有釋法呢單嘢，仲安排袁國強同民主派議員同枱，好彩在座人士畀面主人家，無尷尬場面，但都有一段小插曲。


Ronny就話，佢當晚講笑咁向袁國強興師問罪時，袁就「賴」《明報》，話因為Emily嘅同事突然率先報道，佢先至迫不得已，喺前日承認律政司有建議終院向人大提請釋法，以解決雙非問題。不過，在席嘅民主黨何俊仁即時反駁，話若果政府唔做埋呢啲破壞法治嘅嘢，使乜搞成今日咁。


「做老爺感覺好老」

Ronny話，當日朝早忙到冇時間睇新聞，到中午記者call爆機，佢至發現咁大鑊。佢又笑言，第一日做人老爺感覺好老，Emily在此祝佢早日榮升埋爺爺啦！