過勞入廠阿基報平安

【明報專訊】民協馮檢基上個禮拜頭暈暈唔舒服，瞓咗3日醫院，做埋腦部磁力共振，傳到佢病情好似好嚴重，搞到黨友同埋支持者都驚佢有事。佢噚日就透過黨友報平安，話檢查後無乜嘢大礙，今日開始逐步復工，但佢應該要聽醫生建議，今後唔可以咁搏咁操勞，要好好休養。


今日起逐步復工

阿基上個禮拜三唔舒服，連立法會提出不信任梁振英動議嘅會都要缺席，之後佢入醫院住咗3日做檢查。佢嘅黨友李健勤就代阿基向大家報平安，話阿基休息咗幾日已經無乜大礙，估計佢之前暈倒係跟疲勞過度同埋經常夜瞓有關。另一黨友廖成利就話，阿基都近60歲，叫咗佢立法會選舉後應該好好休息，但阿基又無理，估計佢只係積勞成疾體力不支。


李健勤話阿基今日起逐步復工，今日立法會無會開，佢應該會落番地區辦事處。