無綫魔童又隔空過招

【明報專訊】無綫同魔童王維基搞嘅香港電視為咗增發免費電視牌，鬧到火紅火綠，噚日兩邊又燒起嚟。話說噚日有人用傳媒關注組名義喺《新報》刊登廣告，大大隻字寫住「警告」，仲出咗9幅香港電視嘅試映節目劇照，裏面有男咀男同埋撕人臉皮嘅鏡頭，仲反問「以上就是大家需要的更多選擇嗎？」


無綫就話呢啲無社會責任嘅經營者，用誇張、嘩眾取寵手法吸引觀眾，無綫唔贊同，仲要譴責呢啲標榜「重口味」節目，叫家長唔好畀呢啲節目荼毒兒童同青少年。香港電視今次回應好溫和，淨係話家陣電視劇都有「人吃人」、「咬唇」同輪姦鏡頭，無非係顧及戲劇效果，香港電視會遵守節目守則，除咗電視版，節目仲有網上版，顧及唔同口味。


講開又講，無綫兩套重頭劇都收到唔少投訴，《名媛望族》有11宗，畀人話佢嘅不倫戀令人不安、教壞小朋友，而《大太監》有8宗，分別有人不滿太血腥、太暴力，同埋與歷史不符。