馮檢基復工三不准

【明報專訊】民協立法會議員馮檢基上星期三因為過勞頭暈暈入咗醫院，唔少街坊都好擔心佢嘅情况，好彩阿基瞓咗醫院3日後無大礙，噚日仲喺「老巢」大坑東邨接見市民，氣色仲唔錯。不過醫生就下令阿基「三不准」﹕一係唔准晚晚凌晨3點先，二係唔准再日日工作12個鐘，三係唔准食10樣高糖食物，好彩阿基話佢鍾意食雪糕同燒鵝，兩樣都冇被禁喎！


阿基話，原來3個幾月前，醫生已經同佢講佢血糖「踩界」，當時佢想靠飲食控制，所以無食藥。點知上個星期二，阿基覺得唔舒服，星期三醒都無好轉，醫生朋友檢查後終於急急入院。


唔准夜日做12個鐘


醫生要求佢日日只做8個鐘，但阿基話自己成日夜晚11點先返屋企，又堅持要睇晒3份報紙、1個電視台新聞「卡士」先，好難唔夜喎！好彩佢已將部分街坊個案工作交畀職員做，希望佢可以減少工作量啦！


雖然係咁，阿基緊亦會繼續落區，例如麗安一個月會去4次，大坑東同何文田就一個月一次。如果大家想阿基將來身體好，就唔好再引佢食米做食物，好似米粉、河粉，亦唔好請佢飲果汁同食喇！


否認個腦有事


有報道話阿基個腦有陰影，阿基噚日矢口否認，佢承認係因為睇有疊影、行路不平衡入院，做過磁力共振，但話只係買個保險，個腦完全無問題。Emily噚日樂見阿基氣色唔錯，唔少街坊行過見到阿基都話放心晒！