張五常講香港災難性經驗﹕

【明報專訊】樓價持續高企令好多人買唔到樓，但著名經濟學者張五常就另有見解，鳳凰網引述佢前日喺北京出席「第一屆鳳凰財經峰會」時嘅演講，話唔覺得內地有房地產泡沫，佢認為市民買唔到樓唔係因為樓價太高，而係因為佢哋冇機會賺錢，所以政府要釋放多啲土地建樓。而佢講開內地嘅保障住房時，更引香港做例子，話香港嘅經驗係「災難性」經驗，因為「把所有窮人放在一起」，小朋友返學時，同學一知佢住窮人區會睇唔起佢，所以應該將窮人分散喺唔同地方會好啲。


「26年前已賞識習近平」

呢位港大前經濟金融學院院長，03年時被美國政府告逃稅，畀美國司法部起訴，之後長居內地。佢前日喺活動上就話中國最差就係引進西方思想，令經濟出現咁多問題，認為中國唔使抄人。佢又大讚新上任嘅國家主席習近平，話26年前已經好賞識呢位「年輕人」，當時身為廈門副市長嘅習近平，請張五常食飯，張覺得對方平易近人又有自己見解。張五常仲話最欣賞有人同佢見解不同，「我好喜歡幹部唔同意我，我係大教授，只要佢（幹部）唔同意（張嘅想法），我就對佢刮目相看」。


想睇教授偉論可瀏覽鳳凰網﹕http://finance.ifeng.com