常秘楊立門想搞AO's got talent

【明報專訊】下星期二係聖誕節，相信唔少人都陸續同親友開party，政務官（AO）都唔例外，日前政務官協會就搞咗個聖誕午宴，成班政務官除咗提早賀節外，仲發揮多才多藝嘅一面，獻唱聖誕歌，平時常任秘書長喺立法會時十分嚴肅，但今次內部活動，就由保安局常任秘書長羅智光彈琴、政制及內地事務局常任秘書長張琼瑤領唱。


前保安局長、新民黨主席葉劉淑儀噚日喺facebook上載當日party嘅相片，佢話估唔到平日嚴肅嘅政務官咁多才多藝，仲透露唱歌好掂嘅民政事務局常任秘書長楊立門，提出下年2月喺大會堂舉行「AO's got talent」，等成班政務官可以比併才藝。如果搞得成，Emily都好想知道，除咗唱歌跳舞外，有無政務官身懷其他絕技呢？