發叔感冒入廠食緊抗生素

【明報專訊】鄉議局主席劉皇發前日請病假，無出席主持立法會發展事務委員會，據悉發叔星期日已「感親」唔舒服，最近仲入埋院，所以噚日都無去開鄉議局例會。發叔囝囝劉業強（Kenneth）就話，發叔家食緊抗生素，仲要一排先至好得番晒呀。


上次鄉議局開執委會，屯門鄉事委員會主席何君堯，帶領爭取新界屋宇僭建物合法化大聯盟衝擊鄉議局，要求同發叔見面。


沙田鄉委會主席莫錦貴噚日就喺鄉議局會議上，提出討論點樣避免再發生類似情况，又話要團結新界人，佢話，有啲嘢「唔講唔安樂」。


貴哥先係力撐鄉議局係一個成熟機構，唔係主席一個人話晒事，又質疑有啲人無做過嘢又話鄉議局無為村民爭取，係「唔知情」或「別有用心」，「拎鄉議局招牌玩」。


何君堯：衝擊對事唔對人

事件主角何君堯就話，自己係「對事唔對人」，又話同政府傾半層天台圍封，到最後「前功盡廢」、「畀人閹咗」。佢亦都認為鄉議局係有做嘢，但就話如果村民不滿去到臨界點，村民會做乜佢都唔知咁話。


鄉議局家喺沙田石門有新大樓，但建造費超支，李嘉誠捐咗500萬蚊畀鄉議局，鄉議局撲水都唔使咁辛苦。