吳康民講CY僭建：係咪要拉佢去打靶？

【明報專訊】前港區人大代表團長吳康民噚日舉行新書發布會，新書結集咗佢以前嘅評論，書名《沒有最好，只有更好！》，係習近平今年2月以國家副主席身分訪美時講過嘅說話。特首梁振英同發展局長陳茂波噚日都有出席，不過發布會只准受邀人士出席，Emily同部分傳媒行家就要喺發布會完咗之後先可入場。


新書發布 CY撐場

CY畀面出席，康民叔當然挺梁，佢老人家話，肯定有「倒梁」勢力，「如果唔係，僭建問題點會仍然仲係滿城風雨？」佢又話，CY已經道歉，承認自己大意，「係咪要拉佢去打靶？」康民叔批評部分人將CY嘅僭建問題無限放大，上綱上線。


佢話，家大家都針對啲芝麻綠豆嘅事批評CY，無乜意思，認為應該畀機會CY專心施政，如果CY喺扶貧、房屋方面做得唔好，到時再批評佢。佢又不忘「訓示」Emily同其他行家，話傳媒有份渲染僭建事件，又話唔好嘅事可以批評，但係傳媒太過一面倒渲染唔好嘅事，好少報道國家成就喎。