曾俊華笑迎小稀客

【明報專訊】學習國情唔一定要上國教科，親身去內地體驗更可以認識祖國，前特首曾蔭權喺2010/11年度施政報告提出設立「香港青年服務團」，資助18至29歲嘅青年人去內地貧困地區服務半年至1年，都有啲後生仔響應，財爺曾俊華噚日就向9個團員頒發服務證書，表揚佢哋去廣東省韶關市義務教學嘅表現。


呢9個年輕人暫時放低香港嘅生活同家庭，去簡樸嘅環境服務學校，佢哋喺2月至7月期間被派到4所學校（龍歸中學、龍歸小學、犁市鎮中心小學同埋花坪實驗學校）支援教學，任教初中、小學及學前班各項科目，仲要協助籌辦課外活動。


財爺噚日頒嘉許狀，統籌活動嘅民政事務局安排咗一班韶關市學生嚟香港觀禮，班小朋友可以乘機嚟香港玩，又可以見番老師，都表現得好雀躍。民政局話服務團計劃第三期已於今年9月展開，有興趣嘅年輕人可以瀏覽www.servicecorps.hk。