阿謙4選舉過關：全家去曼谷

【明報專訊】民建聯葉國謙（阿謙）過去一年經歷多次選舉，做咗全勝將軍，包括區議會、選委會、立法會，同埋噚日嘅港區人代，佢話搞埋人大選舉終於可以鬆一口氣，23號周日會同家人去泰國曼谷玩5日，當係獎勵一下自己。阿謙話唔太想跟團做鴨仔，寧願自己喺曼谷周圍鑽搵美食。


阿謙話，雖然佢參選嘅選舉有幾個都係「小圈子」選舉，但拉票仲辛苦過地區直選。佢話區議會選舉主要靠政績，街坊都會好坦白，係投你就話投你，係唔鍾意你就會講得好白咁拒絕你，但係好似人代選舉1600多名選民，好多都係政商界人士，大家都會好畀面，好少會斬釘截鐵話拒絕你，有時對方話支持，但實情點投票真係無人知，需要更花時間溝通接觸，所以拉票都幾吃力喎。