棠哥助泛民取回鄉證有條件

【明報專訊】行政會議成員、工聯會榮譽主席鄭耀棠前日順利當選港區人大代表，噚日談到佢嘅工作目標，話其中一個目標，就係幫包括泛民在內嘅人士爭取發還回鄉證。不過，棠哥講明要雙方互動，即係泛民要有善意先至有可能成功，又話如果發還回鄉證，仲要鬧多幾餐就無謂。


咁樣係咪等於要泛民妥協？棠哥話，唔可以教泛民點做，大原則係要一齊營造寬鬆政治環境。不過，泛民咁啱就喺噚日宣布正式啟動彈劾機制，棠哥諷刺泛民只係旨在搵事嚟做，叫泛民不如放多啲精力喺民生工作仲實際喎。


棠哥話無諗過參選人大常委，謙稱好多人比佢更有條件，仲表明唔做港區人大代表團長，因為佢鍾意獨來獨往，做團長就有好多顧慮。棠哥話，做咗25年港區人代，最遺憾係上年因為做完手術，行動不便，無去開會，係佢25年來唯一嘅缺席，搞到佢儲唔齊25張出席證，覺得好可惜咁話。


手術後缺席人大 25年首次

棠哥透露，張曉明喺星期二（18日）、即國務院宣布張接任中聯辦主任當日，張已經打電話畀佢，不過棠哥就唔講佢哋講咗啲乜。棠哥話張曉明過去成日嚟香港視察，對香港情况非常了解。