鬍鬚曾 聽Santana憶童年

【明報專訊】政府下月公布施政報告，財政司長曾俊華亦着手準備2月底公布嘅財政預算案，佢噚日喺網誌度話，籌備預算案開始進入最劇烈階段，返到屋企繼續做，所以返屋企途中聽音樂就係休息，佢話近日煲得最多嘅係美國1960年代當紅樂隊Santana新碟Shape Shifter，估計兩個月已翻聽二三十次。


60年代已舉家移民美國嘅財爺話，Santana係佢中學時代已經鍾意嘅樂隊，呢隻新碟重現佢哋喺60年代後期已失去嘅拉美曲風，仲推介當中Dom同Canela兩首歌。佢話鍾意Santana同佢童年經歷都有關係，佢細個住喺紐約曼哈頓下東城區，同一對拉美裔兄弟好親近，當時聽吓拉丁電台播放嘅音樂、食朋友媽媽煮嘅拉丁快餐，頗有「窮風流」嘅味道。佢仲話其實好嚮往拉美人嘅浪漫生活，渴望自己可以孭住結他同行李遊歷南美各國，但畢業後因家人極力反對，令計劃告吹。