「前男友」請聖誕老人祝福前度

【明報專訊】「聖誕老人，你可否給我一張簽名照？」「我家中沒有煙囪，你能進來嗎？」香港郵政今年已收到5600封寄畀聖誕老人嘅信，兩名郵務員化身聖誕老人逐一親筆回信，除咗要應付想像力豐富嘅小朋友，原來仲有唔少成年人來信，例如分享產前喜悅，或者履行對前度女朋友嘅承諾送上祝福，令到代筆嘅郵務員好感動。


原來今年回信嘅「聖誕老人」係兩個女郵務員黃諾汶同葉雅倩，唔好以為佢哋會交行貨寫句「聖誕快樂」就算，兩人好用心，有時更會畫畫回應。佢哋話，拆信時有拆禮物嘅感覺，所以都會用心回覆。


內地妹妹獻出繁體第一次

黃諾汶話，今年收到一封內地12歲小妹妹嘅信，佢第一次以繁體字寫信就係寫畀聖誕老人，字體靚到呢，黃諾汶話足足有90分，封信仲附上小妹妹爸爸寫嘅書法「中國龍」三個大字，非常有誠意。於是「聖誕老人」亦搵嚟郵政局嘅書法高手幫忙，寫番「香港心」三字寄畀佢哋，禮尚往來。


至於最令葉雅倩感動嘅信，係由一個「男朋友」寫嚟，呢位男士曾向已分手嘅女友承諾，會寄信畀世界各地嘅聖誕老人，雖然情侶不再，但「男朋友」仍然列出多個溫馨提示，要求聖誕老人代佢寫信，將祝福送畀喺外國讀書嘅前度！

要寫信畀聖誕老人，記得喺信封上寫上「聖誕老人收」，同埋寫清楚回郵地址同貼上郵票，只要喺12月底前寄出，就可以收到聖誕老人回信。