張宇人為對鞋打麥記工

【明報專訊】有報道話麥當勞請「童工」，當中要做危險煮食工作，麥當勞其後否認有違法。本身都係太子爺嘅飲食界張宇人就話，佢早於1968年已經喺美國麥當勞打工，記憶中炸薯條唔算最辛苦，最難忘係煎牛肉後放上漢堡包上喎。


1960年代時薪1.5美元

張宇人話當年佢喺美國睇中咗一對鞋，要成20蚊美金，於是決定打工，用第一份糧嚟買畀自己。佢喺麥當勞打工最難忘嘅，係要煎完牛肉後將塊熱辣辣嘅肉推上塊漢堡包上，用乜嘢工具呢？當然係手指，佢話掂落塊剛剛煎完嘅牛肉上，手指頭好快就起水疱，食指起水疱後就用中指推，之後又用無名指呀咁。佢用呢個例子去解釋，點解飲食業嘅人對手會較常人耐熱。


咁當年麥記時薪有幾多呢？張宇人話1.5美金，佢仲好自豪咁話，第一次出糧買鞋後，第二次出糧就買咗架車齡十幾年、價值200美元嘅二手車喇。