田二少聖誕玩驚喜

【明報專訊】聖誕佳節，唔少人都會送禮物畀愛惜嘅人，人稱田二少嘅立法會議員田北辰，就送咗一份浪漫驚喜畀太太同家人。事緣太太想二少同埋女兒一家人去澳洲過溫暖聖誕，二少就「蠱惑」，同太太講要落區工作唔得閒，叫佢自己去澳洲，搞到太太好無癮。但實情係二少靜雞雞撲咗同一航班嘅機票，然後等太太噚晚去到機場時畀個驚喜佢！


與家人赴澳過節

如果航班無延誤，田二少同家人家已經到咗澳洲過拆禮物日。田二少同Emily講，佢啱啱當選議員，本來真係好多嘢做，唔容易就到時間，但係又想太太開心，所以諗到呢個計仔。


田二少本來過兩日要返港出席同中學生會面活動，只可以去澳洲陪太太兩日，好彩活動主辦單位體諒，所以唔使趕返嚟，可以陪多家人一日，田二少話好感恩。


田二少話，同太太雖然老夫老妻，但都要間中花心思，佢同Emily講，送禮物唔係計較價錢多少，最緊要係講心意咁話。


議員紛外遊充電

講開假期外遊，唔少議員都喺呢段時間去充電，新民黨主席葉劉淑儀同囡囡去咗新加坡幾日探親兼放假；民建聯梁志祥同家人亦去咗星馬玩幾日，但其間會探訪工作時認識嘅大馬朋友，都算勤力，另一民建聯議員葉國謙就去咗曼谷自由行。