CY平安夜訪避寒中心

【明報專訊】前晚係香港13年來最凍嘅一個平安夜，特首梁振英（CY）噚日喺網誌撰文，透露平安夜同屋企人食完飯後，去咗梁顯利油麻地社區中心探訪避寒人士。特首話，近日氣溫驟降，市民外出或慶祝都要著多件衫保暖，但社會上亦都有人需要關心同援手，仲特別提到，有內地回港長者話返香港搵工有困難，希望佢可以令香港繼續繁榮。


CY話，當晚去到社區中心時已有幾十人，由後生仔到老人家都有。喺寒冷嘅天氣下，呢啲市民不單止需要物質上嘅照料，心靈上嘅關懷一樣重要，仲話一聲問候，一句關心，已經係最溫暖嘅祝福。佢話避寒人士嘅叮囑，正正係佢嘅工作動力。唔知CY施政報告準備咗啲乜去幫助佢哋呢？


網上手機截圖 稱請臨記扮「梁粉」

CY休假前落區，愛護香港力量就將喺周日（30日）發起遊行，話要支持CY施政。網上有手機畫面截圖，話有中資機構員工疑被「徵召」去遊行，本來計劃好嘅假期都要泡湯，亦有截圖稱有人用200蚊「請人」支持CY。不過，Emily噚日曾聯絡兩名上載截圖嘅網民，都得唔到回應，呢啲消息係真係假，要讀者自己小心判斷。