卿姐劉華放下恩怨有偈傾

【明報專訊】民建聯劉江華（劉華）一向都惹火，民主黨主席劉慧卿（卿姐）亦都幾辣吓，兩個人曾經喺新界東競爭立法會議席，但係咪以為兩個人「無偈傾」噃，「劉華」立法會超級議席敗選後，去咗做副局長，日前都好識做咁打電話畀卿姐打招呼，卿姐好客氣，話自己一向對事唔對人，傾公事時唔應該記前嫌，希望黨友都可以一樣！

劉華近期做咗政制及內地事務局副局長，而卿姐就做咗民主黨首個女主席，將來有好多工作往來機會。卿姐話局長譚志源日前有傳短訊祝佢聖誕快樂，而劉華就打過電話畀佢。正當Emily疑惑卿姐接到電話會有乜嘢反應時，佢就笑Emily唔了解佢，話民主派以往同劉華有咩恩恩怨怨係另一回事，但做嘢應對事不對人，既然劉華做咗官，佢就係代表政府聯絡議員，無論邊個官員搵議員，佢都樂意嚴肅地傾公務。


不過卿姐不忘講笑，話政府搵一個同政黨關係唔係太好嘅人做副局長，負責推銷政改工作，或者係政府嘅「陽謀」，專登想搞衰政改，等2017年及2020年特首同立法會普選搞唔成！

卿姐星洲避寒

忙咗一整年，卿姐周五會去新加坡避寒幾日充電，好快返嚟，因為1月1日要參加元旦大遊行。