政府趕住公布諮詢委員

【明報專訊】唔知係咪參與諮詢組織成員任命嘅中央政策組全職顧問高靜芝未諗定，抑或係其他原因，大批諮詢委員會名單遲遲未公布，到噚日即係2012年最後一個星期五，政府一口氣公布大批諮詢委員會新成員名單，成11個咁多，好似廉署轄下5個委員會、監警會、禁毒常務委員會、勞工顧問委員會、環境諮詢委員會等。


環諮會大換血

換血最多係環諮會，換咗10人，幾個環保團體如長春社、地球之友、綠色力量等代表都無得留低，加入多名學術界人士，例如侯智恆博士、熊永達博士、伍灼宜教授、譚鳳儀教授、曾寶強博士同黃煥忠教授等。


至於廉署貪污問題諮詢委員會，新委任咗前港鐵行政總裁周松崗做主席，新成員有譚允芝、立會議員鍾樹根、梁君彥。禁毒常務委員就再由理大教授石丹理出任，新委任周融、許湧鐘、劉文文、施榮懷、狄志遠同謝萬里為委員。


政府繼續委任立會議員林大輝及石禮謙做監警會副主席，新委任議員陳健波做副主席，陳建強、何世傑及陸貽信為新成員。